A metamorfose, de Franz Kafka

A historia cóntanos a transformación de Gregor Samsa, quen un día espertou transformado nun insecto, o que supón un grande cambio no tratamento que recibe por parte da súa familia dende a axuda inicial ate o rexeitamento pleno. Cos apuros económicos da familia pola incapacidade del para traballar, chegan os principais problemas de aceptación que esta historia nos amosa. Serás quen de perdelo?

María.

Frankenstein, de Mary W. Shelley

Esta novela do Romanticismo é un clásico da literatura de terror que aborda un tema de absoluta actualidade: a investigación científica aplicada á creación humana (chamémoslle clonación, células nai ou selección xenética).

Victor Frankenstein é un investigador que pretende crear un ser vivo a partir de restos de cadáveres, pero unha vez que o consegue se lle plantexan toda unha serie de dúbidas morais sobre o acto, máxime cando a súa criatura comenza a pensar, falar e desexar unha compañeira...

As relacións amistosas, familiares e sentimentais (que tamén as hai na obra), a concatenación de catástrofes e o medo acuciante vas ter que lelos; porque non chos podemos contar, hai que sentilos!

Freda

Esta é unha das novas adquisicións da biblioteca do MGB. Ao longo das viñetas en branco e negro desenvólvese unha historia de emigración, de desarraigo, de carencias afectivas tanto no país de acollida coma na terra natal á que se retorna. Para non perdelo!

Arrugas

Este cómic trata con sensibilidade e tenrura unha situación ben difícil: o internamento nunha residencia da terceira idade dun paciente de alzheimer.

Retorno a la tierra

A triloxía (ate o momento) de Retorno a la tierra recolle as peripecias dunha parella nova que abandoa a cidade para vivir no campo. Nos pequenos capítulos nos que se estrutura a obra, preséntansenos anécdotas das persoas do pobo, reflexións sobre o cambio de vida, as desavenencias

matrimoniais, os obxectivos persoais...
Para disfrutalo!
(Sobre todo a partir dos 30)

No pasarán

Nos dous tomos de ¡No pasarán! Giardino presenta ao seu personaxe Max Fridman durante a Guerra Civil española. A súa colaboración cos republicanos, as relacións coas Brigadas Internacionais e un panorama da situación política, social e etnográfica do momento.

Mi madre era una mujer hermosa

A lembranza da familia amósase sen sensiblería. Os conflictos son narrados por unha muller nova que pretende reorganizar o núcleo familiar.

Aya de Yopougon

Aya, unha adolescente, reside nun suburbio. O seu obxectivo é estudar unha carreira, mentres o afán das súas amigas é casar. Xa están na biblioteca os tomos 2 e 3 desta serie. Se che gustou este, segue lendo!

De profundis

Este cómic é o froito da película do mesmo título. Unha visión lírica sobre un pintor que ao morrer no mar descobre o universo (animal, vexetal e de seres míticos) que antes recreara nos seus cadros.
Sempre é un pracer ler e mirar a obra de Miguelanxo Prado; aínda que se bota en falla a magnífica música da película.

Cómo no fui secuestrado en Afganistán

Dado o gran número de analfabetos en Afganistán, o Goberno contrata a un ilustrador para que faga unha versión da Constitución en cómic.
Dende a mirada extrañada do debuxante occidental contemplamos a crítica aos varios factores que na actualidade conflúen neste país: os costumes, as actuacións das ONG's, a situación prebélica...